3 верасня, Ляхавіцкі раён /Кар. БЕЛТА/. Беларускі торф запатрабаваны на міжнародным рынку і пастаўляецца ўжо ў дзевяць краін свету. Аб гэтым журналістам паведаміў міністр энергетыкі Дзяніс Мароз, у час прэс-туру, прысвечанага Дню работнікаў нафтавай, газавай і паліўнай прамысловасці,
перадае карэспандэнт БЕЛТА.
"Важным паліўным элементам у нашай краіне з'яўляецца наш, не пабаюся гэтага слова, нацыянальны набытак - торф. Да шасцідзясятых гадоў у цэлым уся энергетыка і прамысловасць Беларусі ў асноўным будаваліся менавіта на гэтым рэсурсе. Нягледзячы на прыход прыроднага газу і маштабную рэканструкцыю энергетычнай інфраструктуры, торф не быў выключаны з паліўна-энергетычнага балансу. Беларусы заўсёды падыходзілі да пытанняў энергетыкі разумна і стараліся, каб баланс складаўся з максімальна вялікай колькасці элементаў", - адзначыў міністр.
Паводле слоў Дзяніса Мароза, сёння торф займае каля 5 працэнтаў у агульным паліўна-энергетычным балансе краіны і каля 15 працэнтаў у структуры мясцовых відаў паліва. "Беларусь - адна з лідзіруючых краін у свеце па здабычы гэтага прыроднага рэсурсу. Па вытворчасці тарфянога брыкету мы займаем першае месца ў свеце, - гэта сацыяльна значны тавар, які выкарыстоўваецца як насельніцтвам, так і сацыяльнымі аб'ектамі для забеспячэння цеплавой энергіі ў халодны перыяд", - растлумачыў ён.
Міністр падкрэсліў, што торф у Беларусі - не толькі паліва. "Апошнія гады мы вялікую ўвагу ўдзяляем няпаліўным напрамкам. Некалькі гадоў таму было рэалізавана прадпрыемства па вытворчасці покрыўных грунтоў для грыбоў, дзякуючы чаму сёння поўнасцю закрыта ўнутраная патрэбнасць краіны. Акрамя таго, мы займаемся глыбокай перапрацоўкай торфу з атрыманнем гуматаў. Дабаўкі на аснове гуматаў ужо сертыфікаваны, яны павышаюць урадлівасць і садзейнічаюць аднаўленню глебы", - расказаў ён.
Паводле яго слоў, у планах - вытворчасць сухіх гуматаў у выглядзе парашку, выкарыстанне торфу як кармавых дабавак і падсцілак у сельскай гаспадарцы. "Тэмпы росту няпаліўнага напрамку складаюць каля 30 працэнтаў у год. Аб'ём вытворчасці прадукцыі няпаліўнага прызначэння перавысіў 100 тыс. т, што на 30 працэнтаў больш, чым у мінулым годзе", - адзначыў Дзяніс Мароз.
Міністр таксама дадаў, што знешнія абмежаванні не сталі перашкодай для развіцця галіны. "Нягледзячы на санкцыйны націск і адмову еўрапейскіх партнёраў, мы пераарыентавалі рынкі. Беларускі торф сёння запатрабаваны ва ўсім свеце, і ў гэтым годзе прадукцыя няпаліўнага прызначэння пастаўляецца ўжо ў дзевяць краін. Асабліва адзначу Кітайскую Народную Рэспубліку - у 2025 годзе аб'ём паставак туды павялічаны больш як у чатыры разы", - рэзюмаваў Дзяніс Мароз.-0-